Ziaktu: H. Zate
"Min hmangaih lo a
nih hi,"
"Ka hmangaih che a
lawm!"
"Min hmangaih ni la
i thei ang!"
tia a hmangaih berin a
nawrna chu hmeichhe awm nêm, a hmangaih em emin ngen ngawl takin thil a dil a
ni tih hrereng tu chuan a hmangaih chu a nêp zo lul tawh lo.
A hmangaihna vang chuan
a hma hun tur pawh ngaihtuah lovin a tan a inpumpek a. A rilru a hlan a,
a rilru mai ni lovin a thlalak leh taksa hial a hlan a, a nun hial a la
hlan dawn tih lah a hre der si lo.
Hmangaihnain a phuar,
inngainatna leh inngaihnain a zem te pahnih inkarah chuan inthlakhlelhna a lo
piang a. Kar hla danah awm mahse, hlimna an lo inpek tawn ṭhin
ang inpek tumin an inthlakhlelhna tihhlawhtlin an tum fan ṭhin.
A ni, a ni hmeichhe
rilru nem chuan a hmangaihna chauh lo chu ngaihtuah dang a nei lova, Video call
a sex chat an hman ṭhinte chu a hmangaih em em chuan rilru sual puin
Video Screenshot leh Pic screenshot in a lo dahṭhat zel a ring lova, a
ring phak hek lo. Lo dah pawh nise, a hmangaih ber chuan a lakah rilru chhia a
put a ring lo.
A hlutna leh chapo vena
zawng zawng, mahni a lo innngaihhlutna leh a zahawmna chu hlipin, zahna chu a
hmangaih em vanga hlip kiangin, a hmangaihin a hmuh turin a phone hmaah chuan a
taksa khuhtu reng awm tawh lo nen chuan a inlan a, lang lo tura thuhruk
ni ṭhin kha tunah chuan thuhruk a ni tawh lo.
Chu mai chu duhtawk
lovin a hmangaih chuan a saruak thlalakte a dil ṭhin a. Ni e,a tir chuan
a phal ngai bik lo. Thawn pawh a tum ngai bik lo. Mahse, a hmangaihna vanga
bual at a a awm vang nge hmangaih luat vang hian ui reng a nei thei tawh
lo zawk? A mawinana a nu leh pain thawmhnaw mawi leh man to tak tak an leisak
chu hlipin a taksa mawina chu a hmangaih hmuh a tan a thawn ṭhin.
Chutia inthlahlel ta chu
a bialpa pawhin a saruak thlalak te a lo thawn ve ṭhin
a. Mahse, a ni erawhin a en liam mai zawk ṭhin.
Hun leh ni a vei a, chu
hmeichhe ngaihtuah nei lo chuan ngaihtuah thui nei lovin a thlalak sexy tak tak
te chu Facebook ah te a post ta zel a. A post a, a post zel ṭhin.
A bialpa nen an inhmuh chang phei chuan thla te la dunin an thlalak dunna ngei
mai chu a post a, a hunlai kha chuan nuam a tiin a hlim veng veng a. Amah aia
hlim kha awm theiin a ring lo.
Mahse, mahse, an inkarah
ṭhenni kawl a lo êng a. Chu hmeichhe hmelṭha
tak tan chuan tawrhna ni a va ni chiang teh lul em! An inṭhenna
ringawt mah na a tih nak a laiin a video, a thlalak nen lam a rawn darh ta!
Facebook lama a thlalak te pawh a awm ngaiin a la awm reng! Tih leakout a a
vauna kha a hre lo a ni bik lo, dang turin tih theih a nei tawh bik lo a ni.
Vawi khat tihsual a pawi
a, minute khat pawh tling lo a bialpain video a tihlar chuan a thawh tur ang
ang a thawk zo tawh a, a thawk mek reng a, chawlhsan a tum lo. Facebook lama a
thlalak dah pawh a remove hnuah pawh khawi aṭangin emaw miin an rawn
post leh nulh nulh zel. A mualphona chuan zual lam a pan zel a. A ni, a thawk
chak tulh tulh emaw tih mai tur a ni. A tuar a, a tuar tlawk tlawk mai a ni.
Ni a liam a, thla liam
lehin kum a vei a, ṭhenkhat chuan theihnghilh tawh mahse, kha video
minute khat pawh tling lo khan a hnathawh a la chawlhsan si lo! A tawpah chuan
beidawnna leh rilru hahna nen, mahni insitna leh intennain a khat a. Ama nunna
hial a lo chhat phah ta hial a!
A ni a sin, kum 2005
vela video leh thlalak rawn darhvakte pawh kha he thu ziah a nih thleng hian
hmuh tur a la awm a. Reh lama aiin rawn thar thawh chang a ngah zawk ṭhin.Thil
tha lo lam lah hian Social Media ah a darh chak em em mai si. Hman ṭuma
nula 3 video pawh kha tun thlengin Internetah hmuh tur a la awm a, Kan
zaithiamte mualphona video pawh a duh tan chuan zawn peih chuan hmuh mai theih
turin a la awm reng!
Hmanni maia Delhi
khawpuia Mizo tleirawl boral ta pawh kha thenkhat chuan a bialpain a thlalak
thenkhat a tih-leakout sak a, chu chu a thihnaa a kaikuang ber nia sawi an awm.
A nih leh nih loh chu hriat va ni suh. A hre tur ber lah a thi miau tawh mai si
a. Mahse, kha hmeichhe khawngaihthlak tak khatia beidawng taka awm a,
ruihhloh bawiha tal luhtir a, mahni nun pawh hlut zo lo khawpa nepa siamtu kha
a rilru beidawng leh nun beidawn vang chu a ni thei viau awm e. A nun a chan a
a pawi tak zet, a nun a chan mai chu thuhran nise a thlalak mawi lo tak darh ta
te kha he khawvelah hian a cham ve reng tawh awm tho si a.
Thenkhat tan chuan
thlalak lar ta hluai te hi nun beidawnna tham ni lovin, anmahni lar phah ta erh
a inngai an awm a ni mai thei. Mahse, thenkhat tan chuan an nun zawng zawng
tichhia a, rilru hrehawm taka siam theitu a ni. Heti ang kawngah hian, mi dang
mualphona thlen thei ang zawnga social mediaa infiam leh indeuhte pawh hi kan
bansan a tul awm e.
Tin, heti hi a lo ni a.
Nula pakhat chuan facebook kaltlangin a saruak thlalak a bialpa a thawn a. A
bialpa chuan message a delete lova, hun a ral a, an inthen hnu chuan a bialpa
chuan ngaihzawng danga nei leh a. chu a bialnu thar nen chuan Accpunt Password
te an inhrilh tawn a. Chu nula chuan a bialpa saruak thlalak rawn thawn ngawttu
hmeichhia a lo ngai thei der lova, facebook ah vek a post ta chiam mai a.
Hmeichhe awm herh leh awm tha duh lo pawh ni hran lo, a hmangaih berin thlahlel
taka naupang thil dil taka a dil tlut tlut vang a pek ngei hmang chuan a
mualpho phah ta a. Hmeichhe hmel pangngai, en reng reng pawha mi pawi sawi
hlauh hmel pu tak chu hmeichhe dukdak lo leh awm tha peih lo angin a chhuak ta
a.
Hmeichhe tam tak an
kawppui te nena khumlai zawl nun an hmanglai thla la an tam, mualphopui lo an
awm a ni mahna, mahse, mualphopui ta an tam. Intihthinrim leh intihvuivai ni
khuaah mualphona thlentu a ni fo ṭhin. Ka hriatchian ve ve
em em te pawh an kawppuite ngeiin a tihmualpho an awm. An kawppuite pawh
an lo tihdarh vang khan a hnuah chuan inchhir ve viau mahse, inchhir a sawt
tawh lo.
I post a, i delete leh
nghal a ni mahna, mahse, ral leh lama lo thlirtute kha chuan lo download emaw
screenshot emaw in an lo dah ṭha ker tawh thei. Tunlaiah phone a changkang
tawh a. Video call pawh video vekin a screenshot theih leh zel tawh a. Kan
internet speed pawh a sang a, Uplink speed lah a sang telh telh a, Downlink
speed chu sawi loh a leng ni ta se. Minute rei lo teah video lian tak tak pawh
internet lamah an dahlut chur chur a, a ni, a dahluttuin lo paih tawh mahse, tu
emaw chuan an lo dahṭha khiau tawh ṭhin si! A darh tawh a,
internet khawvelah a leng kual tawh a, tu computer leh smart phone ah emaw
chuan a lo awm reng tawh ang. WhatsApp group invitation link anga revoke theih
lah va ni suh! A hna thawh tur kha a thawk reng tawh mai a ni.
I ngaihzawng nena in
infawp lai thlalak i post ve ringawt kha in inneih leh si loh chuan i mualphona thlentu
mai a ni thei a, i taksa lanna i post ve ngawt kha nakina nangmah runtu che an
la ni thei. I thlalak sexy tak i post kha nakina i nun vawchhe vektu a la ni
thei a ni a. Sum hai luhna atan i hmang a, i nun khaw siamtu a nih erawh chuan
kan sawi phak a awm lo. mahse, facebook model, Model hlawh nei lo chi nia i
taksa i lo pholan ve vak ringawt khan i zahawmna i tichhe mai mai zuk
nia. Mi pakhat chuan,
"Mipate hian Hmeichhe taksaah hian a lang lo a piang hmuh an
chak a, a lang tlem apiang an zah a, a lang tawh chu hmuh nawn fo an chak vak lo!" a ti, tak tak
ni maw.
Fimkhur la, i
inchhirna tur kawng chu zawh tum suh. I hmangaih em em pawh nise, "Ka
hmangaih che," tia inngaihsakna a i tihlan kha duhtawk rih la,nakina i
mualphona, natna leh inchhirna thlentu tur thil chu engmah lo ti lul suh!! Ngaihzawng
inakrah chuan, ‘ Hmangaihna kha tawk rawh se’
06 July 2018 | Aizawl
No comments:
Thanks for your comment.