KAN INNGAIZAWNG EM? 2

CHAPTER - II

Ziaktu: Rinfela Zadeng,

Columnist, www.tleirawl.in

Tute nge an nih?

Mali Diana Profile

Mali Diana hi a laiah hming chu Malsawmtluangi a ni a. ‘Diana’ tih hi chu ‘Rom mite eng pathiannu’ tihna a ni a, a inphuah belh ve mai mai a ni ang.

Nula ngo lutuk lo, Feet 5 leh inchi 3 vela sang a ni a. An unau hi 3 niin amah hi a lai a ni a, hmeichhia vek an ni. A chhang chiah hi Vairampur ah hnathawk in a awm a, a u erawh chuan pasal anei tawh a. A ‘birth day’ chu February ni 20 a ni. BA a kal lai chuan Government Aizawl College ah English subject a ‘core’ thin a. Tun ah hian Mizoram University ah Mass Communication a zir mek.

A nu leh pa te nen Ramhlun Venglai ah an cheng a, a nu chu Naupang Sunday Sikul zirtirtu a ni a, a pa erawh chuan dawr a nghak thin. A pi leh pute in an luah a, chhungkaw inlungrual leh zahawm tak an ni. Mali hi a nula fel tak a ni a, Facebook leh Instagram vela a thlalak te hi a zahawm in mipa tan pawh a zuamawm tak thlalak a nei lo. A takah pawh chuti ang bawka nula zahawm leh fel, nu hnap mai leh inkhawm ngaipawimawh em em a ni.

Scooty a khalh thiam bawk. Ze zawi fe e tilo in a harh ru phian a, fiamthu a duhin a chimawm thiam hle!

Rinawma Profile

He pa hi chu a chanchin sawi vak tur a awm lo - a hangin a harh em em a, a tawng duh  hle bawk! An unau ah a upa ber a, unau 4 niin a upa ber a. Farnu pahnih neiin an tlum ber ah mipa a awm. A laiah hming chu Lalrinawma a ni.

Chhungkaw ropui lo leh rethei ve tak atanga lo seilian niin Pathian khawngaihna in tunah hian Pathian thu zirin Aizawl ah a awm mek a, Pathian hian a khawngaih em avangin tun dinhmun hi a thleng thei a ni. Amah ah chhuan tlak engmah a awmlo a, pa te takte – feet 5 leh inches 3 vel lek a ni!

Mizoram chhim lam Zopui khua atanga lo kal a ni a, Presbyterian Kohhran a ni. Music a thiamlo a, motor engchi mah a khalh thiamlo a, cycle erawh a khalh ve thiam sawlh sawlh.

Chuti ang vel chu an ni – he thawnthu a a changtute chu. Thawnthu ropui leh ngaihnawm a ni hran lo a, i lo chhiar ve zel dawn nia – i peih chuan.  He thawnthu hi ‘live’ a nih avangin a tawp dan tur hi a la hriat loh a, an changtute hi engtin zel nge an awm ang tih chu chunglama mi kut ah a awm.