ZU ZUAR FANU 43

CHAPTER--43

Ziaktu: R'z Thangluah

columnist, www.tleirawl.in

Hun leh ni a liam a,kum te a lo thar leh ta. Max-a fanu pawn kum 1 hmel a hmu ve ta reng mai;mahse,Nu tia koh tur a neilo tur chu Notei chuan a ngai ngam thlawt lo a ni a vah nu chu a fanu angin a en a,ṭawng a lo thiam hunah pawh amah chu Nu tia a koh theih nan nitin a vahnu chu a fanu ang chiahin a enkawl ṭhin.

"Hi...Happy Birthday,ka hmangaih che,"Sangtea chuan Msi chu a rawn nuih var var a. Msi chuan a rawn kuah nghal a,"Keipawn ka hmangaih che,i theihnghilh ta emaw ka tia sin,"a lo ti nghal mawlh mawlh a. Sangtea chuan,"Hmangaih ber te birthday te kan theihnghilh phal i ring mi? Chuan,zanin chu thil surprise tur che ka nei a,"a ti nghal vat a. Msi chuan,"Eng thil nge ni a? Ka van hre chak tawh tak,"tih pah chuan a lo nui sâng a. Sangtea chuan,"Tuna ka hrilh che chuan surprise a ni thei dawn lo sin,"tih pahin Msi biangah chuan a fawh sak zauh a. Msi chuan,"A rukin min hrilh mai la,"a ti a Sangtea chu a rawn melh zauh a. Sangtea chu a nui hawk hawk a,"I naupan chhiatna hi a la reh theilo anih hi Bawihi,ka hmangaih lutuk che nia. Chuan,kan kal hman tawh em?,"a ti leh a. Msi chuan,"Awwii ni dawn tak,lawk aw anu kan hrilh lawk nge aw,"tih pahin dawr lamah chuan a phei nghal a.

"Engnge i ei duh ang le? I duh duh kha lo order la,"tiin Sangtea chuan Msi chu a en a,a nui sun sun a. Msi chuan,"Aaaah i duh duh kha ni mai,keichuan engpawh hi ka duh vek mai,"a lo ti vat a. Sangtea chuan waiter chu a ko a,ei tur chu a order nghal a.

Thil an ei zawh hnu chuan Sangtea chuan,"Wash room-ah ka va kal lawk nge aw,ka rei lovang,"tih pahin a tho nghal a,wash room lam pan chuan a kal nghal a.

Sangtea chu wash room ṭang chuan a rawn chhuak har lo khawp mai. Mahse,a rawn chhuah dan erawh a dang ta,a hnungah chuan waiter 1 hian birthday cake lian lutuk mai leh nalh em em mai chu a rawn nawr phei zal zal a. Khawi lai emaw aṭangin rimawi hmangin Happy Birthday to you tih chu mawi fahran hian an lo play bawk a. Msi chu a ṭhutna ṭangin a lo ding vat a,"Woww...a nalh lutuk ringawt,"a lo ti nghal a,midang awm ve ho chuan an lo thlir ṭhap hlawm bawk a. Sangtea chuan,"Zai rawh le,"tih pahin cake zaina tur chemte chu a rawn la a,Msi kutah chuan a hmehbel nghal a. Cake a zai lai chuan Restaurant chhunga awm ho zawng zawng chuan nui sang chungin,"Happy Birthday to you,"tih chu an lo sa rual ṭhap ṭhap bawk a,Msi chu a hlim kher mai. Cake a zai zawh chuan Sangtea chu a barh nghal a,Sangtea pawh chuan a barh ve nghal bawk a. Midang ho zawng chuan kut an lo beng dar dar hlawm a,Msi chu a hlim takzet a ni a nui sâng a,a nuih paha a ha var tak rawn lang chuan a ti hmelṭha leh zual em em a.

Sangtea chuan,"Aaah en teh saw James Nonoa,"tih pahin Msi hnung lam chu a kawk a. Msi chu a hawi rang kher mai;mahse,James Nonoa hmel a hmu lo reng reng a,"Min tihder a ni maw...,"a sawi zo hman lo. Sangtea chu a hmaah chuan a lo ṭhingṭhi reng tawh a,"Khawngaihin kumkhuaa i pasal ni turin min pawm thei a ngem?,"a ti ta mai,a kut ah chuan zungbun a keng bawk a. Msi chuan chhan mai dan tur a hre lo hle mai,a thil tawn chuan a ti hamhaih a ni ber mai,"Aaah...awii..ka ka..ka hmangaih lutuk che,"a ti bah deuh niai mai a. Sangtea chu a rawn nui var var a,"Keipawn ka hmangaih che lawm. Chuan,zungbun hi ka bun tir thei che a ngem?,"a ti zawi sap a. Msi chuan kut khur dar dar chungin a kut vei lam chu a rawn pe a. Sangtea chuan zungbun chu a bun tir nghal a,"Ka hmangaih che,"tih pahin a kuah vawng vawng a. Midang lo awm ve te chuan kut an lo beng dar dar bawk a.

Max-a pawh a hma aichuan tlem in a zu in pawh a in thlah dul ve ta deuh a;mahse,tlai tin Rv lama kal erawh a bansan thei chuang lo. Notei chuan a thil zir lai chu a chawlhsan tawp a,In lamah a fanu(a fanu tiin sawi tawh mai ang aw,in hriatthiam vek tho kha mifel ho😊)enkawlin a hun pum chu a hmang ta zawk a. Mahse,a nuṭa pa awmdan chuan a rilru a ti ṭhin hle bawk a ni,"Mam,hei Bawihtei pawh kum 1 hmel a hmu ve tawh a. Naktuk mai hi a kum 1 tlinna tur a ni a,a pa ber hetianga i awm reng chuan a lo len hunah engtinnge a ngaih ang che? Ṭha deuha awm hi tum ve tawh teh,"tiin a thiam ang tawkin a nuṭa pa chu a zilh ve a. Max chuan chhing duar duar pahin,"Nia tiraw? Naktuk aṭang chuan ka rui tawh dawn hleinem,"a lo ti ve mai a. Notei chuan,"Tikhan i ti ve ziah a,tlai a lo ni a nga Rv lamah i tlan thla leh a nga,"a ti hlak hlak a. Max chuan,"Tlan thla tawh dawn lo,Bawihtei hi ka ngaihsak tawh ang,"a lo ti ve leh a. Notei chuan,"Nihchuan min tiam rawh Bawihtei kum 1 a tlin aṭangin zu i in tawhlo ang tih min tiam rawh,"a ti mauh mai le. Max chu a ngawi vang vang a,"Awle ka tiam a che,"tih pahin a nau kut chu a vuan a. Notei chuan,"Awle i thu tiam hi ka hre reng dawn nia aw,"a ti leh a. Max chuan,"Awle keipawn ka hre reng dawn lawm,"a lo ti nghal vat a.

"Ihhh..englo a nia naktuk hi ka fanu birthday a ni a. I nu nen in lo kal ve dawn nia aw,in lo kal loh chuan ka lungawi lo ngawt ang aw. Chuan,tlaiah chaw hlui kil ho nghal tur a ni bawk a,"tiin Max chuan Msi chu a hrilh malh malh a. Msi chuan,"Ee tehreng mai,kan lo kal ngei ngei ang,"a lo ti vat a. Max chuan,"Chuan maw,min lo hau hrep teh,"a ti ringawt a. Msi chu a nui hawk hawk a,"Engtia hauh nge i duh a?,"a lo ti vat a. Max chuan,"Ka hre bik lo nasa deuh deuhin a ni mai,"a lo ti ringawt a. Msi chuan,"Tak takin hau nilovin,ka zilh zawk ang che aw. Ka zilh phak leh zilh rual chu i ni miah lova;mahse,i awmdan hian a zir miau silova tiraw? Naktuk i fanu kum 1 tlin lawmnaah thu i sawi ngei ka ring a,rui lo hai lovin i sawi thei ang tiraw?,"a ti phawt a. Max chuan,"Aww thei ang,"a lo ti vat a. Msi chuan,"A ṭha lutuk mi zawng zawng hmaah in siam ṭhat i tum thu i sawi a nga. Chu chu nangpawn i tih puitlin ngei a ngai bawk ang,"a ti leh a. Max chuan,"Umm ka hria lawm. Mahse,a tawp nan vawiin in leh ka duh a,"a ti leh a. Msi chuan,"Tunah pawh i meng chiai mai a,in a ngai tawh rih lo. Naktukah a ṭhing rim namin awm lo ang che,"a lo ti nghal vat a. Max chuan,"Huiham hun hi her let leh theih nise ka ti takzet,"a ti hul hak a. Msi chuan,"Ni e tiraw? Mahse,kan her let thei tawh silo. Engpawh nise,i hun liam tawh chu i siamṭha thei tawh dawn lova;mahse,i hun hman mek leh i hma hun tlemte chu i la siamṭha thei a sin,"a ti leh a. Max chuan,"Ni e i sawi dik chiah lawm. Ka thil tihsual rah chu ka seng mek a nih hi chuan,i laka rinawm lo taka ka awm vang khan min ngaidam mawlh mawlh dawn nia aw,"in thlahrun hmel taka tih pah chuan Msi chu a rawn melh zauh a. Msi chuan,"Khang kha chu theihnghilh tawh rawh. Hriat reng chi pawh a nih loh kha,naktuk aṭang chuan nun tharin i nung tawh a nga. Ka ṭhian ṭha tak kha i ni leh ang chuan,i fanu tan pa ṭha tak i ni a nga. I nu leh pa tan fapa ṭha tak i ni leh bawk a nga,i nau tan unaupa ṭha tak i ni leh dawn nia aw,"a ti mawlh mawlh mai a. Max chuan,"Awle tehreng mai ka hre reng ang,"a lo ti ve bawk a.


Tlai lam dar 3:00pm chu hun serh hman hun tur a ni a. Max-a fanu birthday chu Pathianni a ni a,lawmpuitu te pawh an ṭhahnem khawp mai. Msi te nufa pawn an rawn lang ve a,Emily leh Hriata an rawn kal bawk a. Sangtea pawh hunserh hman dawn ṭepah a rawn thleng ve bawk a. An hlim ho dar dar khawp mai.

Dar 3.00pm ah chuan Max-a pa chu a rawn ding a,lawmthu tlem a sawi hnu in Bible chang a chhiar a,a chhiar zawhin a ṭawngṭai leh a. Chumi zawhah chuan Max chu thusawi turin a rawn ding chhuak ve nghal a;

"Awle hei a hmasa in vawiin ka fanu kum 1 tlin lawmna min lawmpui tura lo kal zawng zawngte chungah lawmthu ka sawi mawl mawlh a. Ka sawi deuh ṭeuh dawn a,a sei maithei a min lo hrethiam dawn nia aw. Nangni hi ka chhungte vek in ni a,ka tunhma nun pawh a hre chiang ber ber tu te in ni a. Mahse,tunah erawh chuan heti mai hi ka ni a. Ka thil tihsual chuan min rawn vaw let leh ni berin ka hria a,hun lo takah nupui ka nei a. Mahse,a rah chhuah erawh a chhe leh si,nitin in chhir reng rengin hun ka hmang chho a. Rilru hah chhawk zangkhai turin zu leh sa hmunah ka tap lut a;mahse,zu hian rilru hahdamna aiin rilru hahna min siam hnem ta zawk a. Ka fanu pawh ngaihtuah nachang ka hre ta lo,nitin ka rui a ni ber mai. Ka ruih reng ṭhin avangin ka hna pawh ka kal thei lova,aikal ka la ta reng a. Mahse,vawiin ka fanu piancham aṭang hian nun thar in bul ka ṭan ve tawh dawn a ni. Vawiin aṭang chuan zu vangin ka buai tawh lo a nga,ka fanu neihchhun vang chauh hian ka buai tawh ang,"tiin a thiam ang tawkin a sawi ve mawlh mawlh a.

Hun serh hman zawhah chuan chaw ei an siam nghal a,an hlim tlang dar dar hle mai. Max chuan a fanu pawm chungin Msi leh Sangtea te awmna lam chu a rawn pan a,"Va ei ve nghal daih u la,"a rawn ti a. Msi chuan,"Aaa a ngai hleinem,naupang ho khan ei hmasa se keini chu a hmanhmawh thlak hleinem,"a lo ti nghal vat a. Sangtea chuan,"Nia kan hmanhmawh lo a nia,"a lo ti ve bawk a. Max chuan,"Bawihte,hei anu Msi a nia,chuan hei hi apa Sangtea aw,"tih pahin a fanu chu a be mawlh mawlh a. Msi chuan,"Khawmaw ka lo pawm ve chhin Bawihte,i van hmelṭha tak. Max kan 3 hian min lo hmeh sak lawk teh,"tih pahin Max chu a phone a pe nghal a. Sangtea pawh chu Msi bul ah chuan a rawn ding hnai ve nghal a,"In inring maw? Bawihte,lo hawi rawh le,"tih pahin Max chuan a click nghal mawlh mawlh mai a. Msi chuan,"A fel khawp mai a pa a chhun a nih hi,"tih pahin a nui var var a. Max chuan,"Chutia mawn le,"tih pahin a lo nui suk a. Sangtea chuan,"Phone kan hmang lawk aw,"tih pahin a kal nghal a. Max chuan a lo hrethiam nghal vek a,"Pawi ka ti lutuk Ms,a van nuam lo tak,"a ti zawi sup a. Msi chuan,"Engmaw nuam lo chu?,"a lo ti hâ a. Max chuan,"Sangtea kha va um zui rawh,Bawihtei kha chu ka lo pawm tawh a nge,"a ti a,a fanu chu a la a a kal ve nghal daih a.

"Tinge tiang khan âtthlak takin i chet ṭhin a?,"Msi chuan Sangtea kutah chuan a vuan a. Sangtea erawh a ngawi reng thung a Msi bawk chuan,"Mawhh...tiang khan i awm a? A nuamlo ka ti nia,"a ti leh a. Sangtea chuan,"Naute kha pawm chungin a bulah khan va nui leh rawh,"a lo ti bul hmuk a. Msi chuan,"Huiham engnge i hriat a? I van ho tak,nih ka tihpalh lutuk,"tih pahin Sangtea kawngah chuan a rawn kuah a. Sangtea chuan,"Tihpalh i tih hian engkim a fel vek theih i ring a mi?,"a ti leh hmuk a. Msi chuan,"Aih ring love mahse,nuam ka tilo a lawm. Khawngaihin tiang hian awm lo teh khawngaihin,"a ti mawlh mawlh mai a. Sangtea chuan,"Ka haw mai ang,"a ti leh hmuk a. Msi chuan,"I haw daihin midang bulah engtinnge chhuan lam ka siam a nga? Haw lovang,"a ti leh a. Sangtea chuan,"Pawi ka ti in 2 a in nui dun vel kha hmuh hrehawm ka ti a ni,"a ti leh a. Msi chuan,"Huiham tinge tiang hian i awm a? Min hmangaih a ni lawm ni? Max chu ka ṭhian a ni lawm chuan,a hma pawn nangman anihkha min hmehbeltu,"a ti ve mauh mai a. Sangtea chuan,"I ṭhiannu nen min hmeh bel ve tho a lawm,"a ti leh a. Msi chuan,"Ni e a dik ka ṭhiannu nen ka hmeh bel ngei che u. A chhan pawh i hriat kha,hun liam tawh chu sawi chhuak tawhlo teh ang khawngaihin,"a mittui chu a tling leh pam tawh a,Sangtea chuan,"Awle nih lut ang,"tih pahin In chhung lamah chuan a lut nghal daih a.