The Citizenship (Amendment) Bill 2016 duhlohna pass vangin Mizoram sawrkar chungah MZP lawm

tlerawl.in | 2nd July 2018: Mizoram Sawrkarin The Citizenship (Amendment) Bill 2016 duh lohna House ah resolution a pass vangin, Mizoram Sawrkar chungah Mizo Zirlai Pawl chuan lawmthu a sawi.
"Mizoram State Legislative Assembly hnuhnung ber Ni 28th-29th June, 2018 a neih zawh takah The Citizenship (Amendment) Bill 2016 duh lohna Mizoram House-ah Resolution pass a ni chu MZP chuan lawmawm a ti  hle a, Mizoram rorel khawl kan MLA rualte chungah thinlung takin lawmthu kan sawi a ni." tiin MZP thuchuah chuan a sawi.  He thuchhauh hi 02 July 2018, Thawhtannia chhuah niin, Asst. genral Secretary, Pu H Lalthianghlima'n hming a ziak. He bill The Citizenship (Amendment) Bill 2016 hi tunlai India ramin a buaipui ber pakhat a ni a, The citizenship Amendment bill 2016 hian India khua leh tui zawng zawng a nghawng avangin ngun zawk a  ngaihtuah hi a tul a ni.

The Citizenship (Amendment) bill 2016 hi pawm a nih chuan Afganistan, Bangladesh leh Pakistan atanga India-a lo lut heng ; Hindu, Sikh, Buddhist, Jain, Parsis emaw Christian emaw te chu tunhma ang a man a, Jail a khung a thawn haw tur ni tawh lovin, kum 6 chhung India a lo awm tawh an nih chuan India khua leh tui nihna pek tawh zawk tur  an ni. Sakhaw behchhana Citizen nihna tur bill ani a. Hei hi Mizoram tan a him lo lehzual a ni. Mizoram ah pawh NGO Coordination kaihhruaina hnuaiah All Political Party leh All NGO ang pawhin duhlohna lantir a lo ni tawh a, hemi chungchangah hian Memorandum inang tlang thehluh a ni tawh nghe nghe a ni. Heti ang a The Citizenship (Amendment) Bill 2106 duh lohna Assembly House ah hial pass a lo ni ta hi MZP chuan thinlung takin lawmthu a sawi tak meuh meuh a ni.

He Bill duh lohna lan tir hian NESO pawh in North East hmun hrang hrangah Ni 21st May, 2018 khan Sit-in-Protest neih a lo ni tawh a, Hemi ni hian MZP leh NESO bul tumin Aizawl ah pawh Vanapa Hall tualah Sit-in-Protest neih a ni bawk. Citizenship (Amendment) bill, 2016 duh lohna lantirin hemi ni vek hian India hmar chhak State hrang hrang ah protest hi kalpui a ni bawk. MZP pawhin State Lagislative Assembly a pass turin MLA rualte hnenah ngenna an thehlut tawh nghe nghe a. "MZP chuan The Citizenship Amendment Bill 2016 chu India rorelna sang ber Parliament House a pass a nih loh nan hma a lak chhunzawm zel dawn a ni." tiin MZP thuchhuah chuan a tralang.