SHALOM CHILDRENS' HOME LAWNGTLAI DISTRICT TIHTAWPSAK

Aizawl | August 5, 2018: 

Shalom Childrens' Home Bualpui NG, Pu Ramthlirliana Chinzah enkawl mek a awm naupangte chu July 24, 18 khan  Child Welfare Committee Lawngtlai ten an nu leh pa te hnenah an dah let.

He hostel hi Bualpui NG ah hian kum 2015 atang khan Shalom Children Home tih hming pu in Naupang enkawlna hi din a ni a, hetah hian naupang kum 5 aia naupang lo, lehkha zir duhte chu enkawl an lo ni thin. Children's Home hming pu a kalpui an duh a nih chuan Sorkar hnuaia register tura hriattir an lo ni tawh thin a, Hostel anga kal an tum a nih pawhin thuneitute hnenah dan anga registration tifel tura thurawn pek a lo ni tawh bawk.

Heng thil 2 zingah hian Children's Home anga kal an duh zawk avangin sorkarah recognise Children Home ni turin an lo dil tawh a, amaherawhchu Children home ni tura criteria pawimawh tak - Naupang fahrah, enkawltu neilo te, nausen / naupang hlamchhiah te enkawlna ang zawnga kalpui a nih loh avang leh he home ah hian naupang lehkha zir lai, kum 5 chin chunglam chauh dah theih ti zawnga Home neituten dan an siam avangin dan anga permission pek theih ni ta lo va, Section 21(4) of JJ Rule 2016 tlawhchhanin khar nghal tura hriatirna chu ni 20.6.2018 khan sorkarin a tichhuak a. 

Hetianga Children Home ang zawnga kal zel a rem tak si lovah chuan Lawngtlai CWC chuan an naupang kawl mek te chu an nu leh pa te hnenah chawlkar khat chhunga a dahlet vek tur leh haw na nei lo te chu an hnena hriattir turin thupek (order) a chhuah a.

Thutiam hun a zawh hnuah Naupangte hi Unrecognised home-ah hian kawl an la ni tih report dawn chu phone hmanga finfiah a ni a, hetiang a lo nih takah chuan 24.7.2018 khan Lawngtlai CWC chuan Bualpui NG ah hian Session an han neihchilh ta a ni.

Lawngtlai District Child Welfare Committee te hi an Chairperson Pu HL Rinawma hoin member panga(5) an thawk a, an chhungte hnena Naupang dahlet tur thupek (restoration order) ngaichang leh a tul ang ang buaipui turin DCPU staff-te, Lawngtlai Police, Bualpui Ng Police ten an tawiawm bawk.

Child Welfare Committee in a tlawh lai hian Shalom Children's Home ah hian naupang pariat(8) an awm mek a. Heng naupangte hi restored (an chhungte hnenah dah let) nghal an ni. Hemi ni a lo kal thei lo leh remchang lo te chu Lawngtlai ah koh an ni a a tuk 25.7.2018 ah Naupang hmakhua tur ngaihtuah chhunzawm a ni. Naupangte awm zui zel dan thlithlai a vilzui tur leh an thil hmuhdan kimchang report pe turin CWC chuan Lawngtlai DCPU chu a hriattir a. Lawngtlai District CWC chuan a tul angin Naupangte hmakhua hi a la ngaihtuah țha leh ang. 

Home hi tu pawhin din theih a ni. Mahse, Sorkar in criteria a pek angin DAN ang thlapa kalpui a ngai țhin a, hei hi mipui te pawhin  i hre thar leh ang u.

Home a naupang lut leh chhuak chungchang hi CWC thuneihna a ni tih hria ila. Children's Home ah hian CWC phalna lo chuan naupang dah theih loh va, chutiang bawkin lak chhuah leh duh hunah pawh CWC kaltlang zela tih tur a ni.