Airtel company-in an intiam angin, August 2018 chhungin Tlabungah 4G network an pek chhuah tâk loh avangin, Tlabunga Infratel tower aṭanga signal an pek chhuahna khawl chu September 1, Inrinni khan Tlabunga YMA branch pathumte'n an tihthihsak.
Tlabunga YMA branch pathumte chuan, Airtel chu an thutiam tihlawhtling loah an puh a; Tlabung leh a chhehvela network an pek sa 2G pawh a hman tlak loh tial tial tih an sawi. Sum sénga an service leisaktu mipuite'n prepaid recharge pack man an cháwi thlàwn fo tih sawiin, Airtel chu an service an tihṭhat hma loh chuan an khawl tihtawpsak mai loh chu duh thlan tur dang an nei tawh lo niin an sawi a ni.
Tlabunga YMA branch pathum hruaitute sawi danin, kum 10 chuang kal taah Tlabungah Airtel inbunin service an pe ṭan a, bul an ṭan aṭanga tun thlengin an service ti ṭha turin khawl tihchangtlun leh thuam ṭhat an nei lo a, an service-in a hma a pha lo tial tial tih an sawi a; service ṭha zawk an pek chhuah hma chu an khawl tihnun leh an remtih loh tur thu an sawi bawk.
- Vanglaini
No comments:
Thanks for your comment.