Ziaktu: JT Vanlalngheta LLB, PhD, DLitt.
Remna Ni a lo thlen hi chuan remna, muanna leh zalènna neih hlutzia hi kan hre chhuak leh țhin.
Mizoramah remna a awm theih nana, mi mal, pawl hrang hrang leh kohhrantena hma an lâkna chu mi dangte sawi atan lo dah țha ta ila. Awmze nei taka, a huho leh pawl hminga inhlawm khawm țha tak leh inlungrual tak sia hma lakna nasa leh ropui ber chu Students' Joint Action Committe (SJAC) hma lakna kha a ni.
Lalrinliana Sailo, President, All Mizoram College Students' Union (AMCSU) chuan remna a awm theih nana hmanrua atana zirlai pawl chak tak dinna atan khatih laia zirlai pawl awmho kha Aizawl College-ah a kokhawm a, hetah hian țhianpa Zothanmawia Ralte chu Chairman a ni. Tin, a hnua tel, zirlai ni chiah tawh lo, Pu Lalsanga Sailo, f/o Michael Sailo (L), Pu K Sangzuala (Sangtea) leh Pu CS Chawngchhuma, Lunglei te pawh Sorkar hna bansanin an tel bawk a. A hnua SJAC Chairman ni ta Pu Lalhmingliana leh țhian dang eng emaw zatte, an hming kan lam mai theih rih lohte pawh zirlai ni tawh chiah lo an ni nain remna duh vek an nih avangin an tel vek a ni. Hming hmerha hriat theih chinah Talo Rosanga 2rd yr BA, Aizawl College leh Lalchhawnkima, Aizawl College/Mission Veng te pawh he pawl dinnaah hian an tel a ni. Tichuan kum 1985 khan remna leh muanna nawrna atan zirlai pawl lian tak leh chak tak SJAC chu a lo ding ta a ni.
Khatih laia Students' Joint Action Committe hruaitute chu hengte hi an ni:-
1 Chairman: Pu Lalhmingliana (a hnua MP lo ni ta)
2 Vice Chairmen:
(a) Pu KS Thanga (tuna Hon'ble Minister lo ni ta)
(b) Pu C Lalringliana, 2nd yr BA, PUC (tuna Venghluia cheng ta hi). Ani hi Pachhunga University College-a MZP Branch-ah pawh President a ni bawk
(c) Pu Thangchemsanga (tuna Ex-MDC, LADC lo ni ta)
3. Gen Scy: Pu RF Muana (fam dairial min chansan ta) , Tuikual.
4 Secretary, Information: Pu Lalrinliana Sailo, 3rd yr BA, Hrangbana College (a hnua Ex-Cabinet Minister lo ni ta)
5. Joint Secretary:
(a) Pu H.Lalengmawia, 3yr BA, Aizawl College, (P&E Secretary lo ni ta) leh.
(b) Pu J.T Vanlalngheta, 3yr BA, Aizawl College te an ni.
Hêng bâkah hian hruaitu fel tak tak Pu K Hrangzual, (Chaltlanga cheng ta), Pu Zonghina (fam min chan san ta) leh Pu Lalthawmmawia (Kohhran upa lo ni ta), Tuikual, Pu Thanghleia (fam min chan san ta) leh hruaitu dang, remna a awm theih nana chaw kan ngheipui mi țha hnem tak an awm, a bua chhuah theih hun a awm chuan tun aia chipchiar deuh zawkin kan la ziak dawn nia.
Kan vai deuhthaw hian MZP member chu kan ni vek a. Amaherawhchu, khatihlai khan MZP chu chhan eng emaw avangin langsar taka din kha a rem loh avangin hmanraw (platforma) dang siam a ngai a ni; chuvangin, keini țhianzaho MZP leh heng kan din, telna leh hruaitus țhiante sn țanna tho-AMCSU (All Mizoram College Students' Union), SCAP ( Students' Conference for Action Programme), etc chu SJAC-ah hian remna (peace accord) a awm theih nan kan inchhung lût ta vek a ni.
Aizawl khaw chhunga High School leh College-a zirlaite sawm chhuakin Sipai làm mual leh Treasury Square-ah te Zirlaite nen chuan chaw kan nghei a, keimahni tawkah chuan kan bei nasa ve hle. "MNF (Pu Laldenga) leh Sawrkar Laipui hian remna in siam hma loh chuan zirlaiten chaw nghei hi kan tàwp san/bansan dawn lo; a țul chuan thih thleng pawhin chaw kan nghei dawn," tiin a khat tawkin kan thu tlûkna chu Sawrkar laipuiah kan thlen thla zel a. Tuna Aizawl Treasury Squire-a Assembly Annexed leh traffic point inkarah hian dawhkan kan húng tlar a, mi țhahnem takin zan rei tak tak thleng min rawn țhutpui țhin a. Kan thla a muang hle.Tin, chaw ngheina hmun lian ber AR làm mual chu, chaw nghei tura lut tawhten duh hun huna an chhuahsan theih loh nan gate-ahte chuan police-hovin hrui zen an lo pawt mar bawk a. Treasury-a țhutthleng leh dawhkan ațang chuan SJAC thu chhuak, Sawrkar laipui hnena thawn thlak àwm chi reng rengte kha chu H.Lalengmawia leh J.T.Vanlalngheta-ten Sap țawnga letin an thawn thla țhin. Kum 1986 kum tir ațang kha chuan chumi thla, "chu mi niah chuan Bandh neih tur, kawng zawh tur, chaw nghei țan tur," tihte chu kan hlapui ber a ni.
Delhi lamah kan hruaituten kawng zawhin an lo nawr ve bawk a. Kawng zawh an huaihawt avang hian kan GS phei chu motor-in a su thlu a, chal báwk luauvin a lo haw a, a dam chhungin a chalin a bàwk phah ta a ni. Aizawla beih rûnpui kha Vice Chairmen hova neih kha a ni a. A chang chuan khua a har lek lek țhin. Tin, SJAC workers leh zirlai eng emawzat chu Tuirial jailah an tanga; táng zat chiah hi hriat a har hle a, mi 400 aia tama sawi te pawh a ni bawk a. Ka hriat theih chin, C Lalringliana leh Lalrinliana Sailo te zu chhuah (ti ila, an zu hruai hawn ti zawk ta ila) chu bus pahniha khat tawk 64 chiah an ni (Mi dangin rawn report ve zel se a țha ngawt ang. Tih tur, thawh tur a tam a, khati lam ringawtah ngaihtuahna kan seng hman lo va, a dik tak hre tur chuan inràwn khawm deuh a la ngai ang.Tunlai angin information a la țha tawk si lo va, kan thil hriatte pawh thel màm ngai a awm maithei e, i thawh khawm zel ang u.
Tin, Veng țhenkhatah political party worker țhenkhat leh kan naute (SJAC duty) lo inti buaia lo inau el deuh te pawh hriat tur a awm țhin bawk. Khangte kha a hun laiin hriatthiam loh chin nei mah ila, ṭhahnem ngaih vang leh thu inhmuh loh palh vangte a lo ni a, remna leh muanna a thlen theih nana țhahnem ngaite kan lo ni vek, tiin tlang kàwm ila. Ram buai a reh nan leh Remna a then nana SJAC hma lakna vanga Jail tangte, chaw ngheinaa min țawiawmtu, khatih laia High School zirlaite, College zirlaite leh tuna la dam zawng zawngte chuan he thu ziaktu hnenah hian in hming leh phone number ldt min rawn hrilh ula a lawmawm ngawt ang; nangnite nena țhahnemngai taka chaw kan nghei kha Pathianin mal a sawm a ni tih hi i hreng ang u. Tin, khatih laia rual u, hnam hmangaihna vanga țhahnem ngai taka zirlaite chaw nghei, zàn rei tak tak thlenga min rawn țàwiawmtu Pu Lalduhawma, former IPS Officer leh mi dangte, tun maia an hming han mal man theih rih lohte chungah kan lawm em em a ni. Tin, SJAC kha tun thleng hian tihtawpna mumal tak kan la nei lova, a hming chuan la awm renga ngaih a ni ti ila legal tak chuan a dik àwm e.
A hnua kan han thlir let hian hetiang hian ngaih dan a awm thei a- Politician țhenkhatin an mahni ham țhat nan zirlaite kha min lo behtir vak mai a, zirlai na na na, rilru thianghlim chuan career-in a chhiat phah thei a ni tih ngaihtuah hauh lovin kan lo bei chiam a lo ni a. 'A hmun leh hun azirin, hnam tana țhatna tura a hmatáwng atana zirlaite hman hi nakin hun lo la awm zel tur ah kan hnam tan a țha zawk ang nge țha lo zawk ang' tih chu țhangthar leh mi zawng zawng chhan fiah atan kan dah e.
Zoramah remna a awm zel theih nán Pathian hnenah țawngțai zel ila, remna hi tihchhiat a nih loh nan i vêngin i vawng tlat ang u.
Mizoram, Mizo hnam dam reng rawh se.
(He thuziah hi a lai thei ang ber, dik thei ang ber tur leh rilru țha tak pu chunga duan a ni; Ram buai a lo reha remna leh muanna a thlen ngei theih nana he Zirlaite beihna thu ziah nan hian a hruaitu la damte zingah pawh vantlang chung lama ngaihte nena uluk taka inrawn khawma ziah chhuah a ni nachungin hmun ren vangin a la kim lo hle ang tih kan ring. Chuvangin, ziah dik loh palh a lo awm a nih chuan inhriatthiam ni mai rawh se, a hnuah changtlung zawka ziah pawh a beisei awm e).
No comments:
Thanks for your comment.