ZU ZUAR FANU 34

CHAPTER--34

Ziaktu: R'z Thangluah

columnist, www.tleirawl.in

"Mam,engtinnge i tih theih zawk a? U Msi hi engtinnge i phatsan theih a?,"Notei chu a ṭap pur mai a. Max chuan,"Msi kha rawn sawi chhuak tawh suh,"a lo ti hmuk a. Notei chuan,"Engvangin maw? I chungah eng thil sual nge a tih a? Mihring ve tho a nih hi,a na ve thei tho a sin,"a ti leh a. Max chuan,"A tawk Msi hi ka hmangaih lo,tikhan a chiang em?,"a ti vin ṭhak mai a. Notei chuan a û thinrim a vawikhat hmuhna anih vangin a hlau ngei mai,"Ka tihpalh,"tih sap pahin,a kal nghal nal nal a.

Max leh Kimkimi te inneih ni tur pawh an ruat fel dim diam tawh a. Notei erawh a hlim ve thei lo,a unaunu thar tur chu a pawm thei thlawt lo a ni. A rilru hah changin Msi te Inah chuan a leng lut leh ringawt ṭhin a.

"U Ms,pawi ka ti khawp mai ka u hian hetiang thil hi a ti ang tih ka ring pha ngai lo,"a mittui chu a far fep fep a. Msi chuan,"Note,hrehawm ti reng reng suh. I unaunu thar tur chu ṭha deuhin lo dawngsawng la,kawm ngaih(ngeih nge ngaih ka hre chiang lova.) i tum hram hram dawn nia aw,"tiin a lo hnêm malh malh thung a. Notei chuan,"Anu leh Apa te pawn nangmah bak hi mo atan an duh ngai lo,an inneih ni ah pawh ka kal lovang,"a ti leh nuah nuah a. Msi chuan,"E chutin an ti ngai hleinem,i unaupa a nia a hlimni ah chuan i hlimpui tur a ni zawk dawn lawm ni?,"a ti leh a. Notei chuan,"Ka unaupa ni mah se,a hlimniah ka hlimpui ve thei lovang,"a ti leh hmak hmak mai a. Msi chuan,"Note,khatin an ti ngai lo. Kimkimi pawh misual a ni hleinem,i u in a hmangaih a,Kimkimi'n a hmangaih bawk a hlim taka an awm i rem ti lo mi? Keichuan hlim takin awm se ka duhsak a sin,"a ti a,Notei sam chu a chûl sak hliau hliau a. Notei chuan,"I rilru hi chu a ṭha ve ngawt mai,ka u ni reng tho ang che aw,"tiin a rawn nui sen sen a,Msi chu a rawn kuah a. Msi chuan,"Umm tehreng mai,i u ka ni reng dawn lawm,"tiin a lo kuah let ve a.

Max te inneih ni tur chu a rawn thleng ve ta. Msi erawh a hna a kal turin a insiam malh malh thung a. Pi Ruati chuan,"Bawihte,hahdam deuhin awm tum ang che aw,"tiin a lo hnem a. Msi chuan,"Nu,ka ṭha lawm min ngaihtuah suh. Ka inkhawm thei dawn silova,nang tal chuan lo inkhawm ve ang che aw,"a lo ti thung a. Pi Ruati chuan,"Ni e ka lo inkhawm dawn nia,lawm te kan lawmpui tur a ni lawm,"tiin a fanu hna kal tur chu a thlah liam a.

Max te in bul velah ṭhenrual ṭha te chu an zi luih luih tawh a. Jessy leh Siamtei pawh an lo awm ve a;mahse,anni 2 pawh chuan an rilru tak chuan an ṭhianpa nupui neih tur an lawmpui tehchiam lo a ni. Siamtei chuan,"Jes,en teh Msi saw ka khawngaih e. Tunlai phei chu a hmel hi a ngui vek in ka hria,"tiin Jessy bengbulah chuan a va hrilhru sû sû a. Jessy chuan,"Nia ka khawngaih khawp mai. Ti chung hian Notei hi a nau ang chiahin a la en thei a nia,Max hi chuan a la tisual chiang khawp ang,"a lo ti ve bawk a.

Emily leh Sangtea pawh inneihnaah kal tura sawm ni ve mah se,tumah mah chu an kal lo ve ve a. A chhanchu,an ṭhiannu chunga nunrawng taka thil ti tu hi an ngaidam thei lo a ni. Emily chuan,"Vawiin chu Msi ka ngaihtuah khawp mai,ṭha deuhin hna a thawk thei em ang chu maw?,"a ti a. A nu chuan,"Ni e ka khawngaih reuh ngawt mai,an inzui rei ve tawh sia,"a lo ti ve bawk a. Emily chuan,"Msi hian Max hi engkimah a ring tawp a ni ber mai. 'Pasal pawh nei dawn ila,Max lo hi chu ka neih ka ring lo,'a ti ṭhin kha a nia. Mahse,rin loh dan deuhin thil a thleng leh si,ka lainat takzet a ni,"a ti leh a.

Jessy leh Siamtei pawh inkhawm turin an insiam malh malh a. Jessy chuan,"Awii ka van phur lo tak,Msi ka khawngaih e,"a rawn ti leh ṭhin a. Siamtei chuan,"Nang aiin ka phur lovang,Max-a nupui tur saw keh buan buan ka chak. A zah theih loh hmel ropui si,"a rawn ti ve hlak hlak a. Jessy chuan,"Keichu thlalak pui vel pawh ka phur lo,engkim hi ka phurlo a ni,"a lo ti leh a. Siamtei chuan,"Engpawh nise kan ṭhianpa nupui neih ni a ni ve bawk sia,phur lo viau mah ila phur viau angin kan lan a ngai bawk si a nih hi,"a lo ti ve leh a. Jessy chuan,"Notei pawh hi a hlim lo khawp mai,a hmel a ngui ruai mai ka khawngaih tawp,"a lo ti ve leh a.

Jessy leh Siamtei chuan an ṭhianpa nupui neih chu an lungawi lo a ni tih lantir nan,inneihnaah chuan kawr dum ve ve an ha a. Notei pawh chuan kawr dum bawk a rawn ha ve a,mi tam zawk chuan kawr dum an hak chhan chu an hrethiam nghal vek thung a.

Sangtea pawh a hnaah a buai map map hle mai. Ziah fel tur neuh neuh a nei ve reng a,a ma tawkah a buai ve khawp mai. A partner chu hmeichhia a ni a,a fel reuh khawp leh nghal a,"Sangte,i zo dawn tawh em? Tih tur i ngah viau chuan ka lo tihpui ve dawn che mi? Chhun thil ei a hun ṭep tawh sia,"tiin a partner Mawipuii chuan a rawn a zawt a. Sangtea chuan,"Aih hei ka zo ṭep e,i ril a ṭam tawh chuan min lo ei san mai rawh ka rawn zawm ve nghal dawn che nia,"a lo ti thung a. Mawipuii chuan,"Aih ka lo nghak mai ang che,ka ril a la ṭam vak chuang lova. Mahse,hmanhmawh kher suh aw,"a lo ti vat a,a nui sen sen a. Sangtea chuan,"Awle tehreng mai,"tih pahin a thil ziah lai chu a chhunzawm leh nghal zung zung a.

Msi pawh damdawiin lamah chuan a buai ve khawp mai a. Khawlum lutuk hnuaiah,mi chitin chitang zi luih luih karah chuan damlo in entir tura lo kal ho chu zawl dawh takin a lo en zel a. Damlo in entir tura kal te pawn Msi bula in entir chu nuam an ti thei hle ṭhin. A chhanchu,hmel hlimlo a pu ngai lova,hmel hlim takin a nuih sâng reng theih vang a ni.

Max nupui neih ni chuan lawmpui tam tak awm mah se,a ṭhian ṭha te erawh an hlim lo a ni. Mo lawmna ruai pawh kil lovin Jessy leh Siamtei chu an haw nghal daih a,"Ka lung hi a awi thei hlawl lo,"Siamtei chu a phun leh hlak hlak a. Jessy chuan,"A nupui thar saw ka mil lo nghal ringawt nia,a lerh hmel si,"a lo ti ve hlak hlak a. Siamtei chuan,"Awiii ka kek bu lawp lawp chak lutuk. Max hian Msi aia ṭha chu khawiah mah a hmu awm silova aw,a la inchhir dawn sia aw,"a ti leh hlak hlak a. Jessy chuan,"Awii sawi tawh lo ang,Max-a hmel te hi ka hne hluah hluah ka ning,"a lo ti vin hlar a. Siamtei pawh chuan a sawi chhunzawm duh ta bik lova.

Tetei chuan tlang kam aṭangin Msi chu Max-a bialnu hlui a ni tih a hre ve tlat mai,"I lo in zep thei hle mai,Msi chu i ex maw a lo nih a? In buildingah in an luah zui lehnghal a,ka zak khawp mai. Chuan,zu zuar chhungkua aṭanga seilian a ni bawk tiraw?,"Kimkimi chu a âng tân tân mai a. Max chuan,"A tawk ngawi tawh rawh,Msi chungchangah engmah sawi theih i nei lo,"a ti vin ṭhak mai a. Kimkimi chuan,"Eng a? Msi chu i va ṭan leh si ve a,i nupui ka nih hi hre reng rawh,"a ti leh tûn tûn a. Max chuan,"Ni e ka nupui chu i ni ngei e;mahse,Msi chungchangah hian engmah sawi theih i nei lo tih hria ang che,"a ti ve hmarh hmarh mai a. Kimkimi chuan,"Hmm a nih tak chu,kei aia i duh te chuan tinge kei hi min neih kher?,"a ti leh hlak hlak a. Max chuan,"A tawk ṭawng tawh suh,i kâ kha i âng leh anihchuan ka beng hreh lo che a nia aw,"a ti vin tuarh mai a. Kimkimi pawh chuan engmah sawi lovin a ṭhu tûm buau mai a.

Msi chuan kuhva a kheh malh malh a,ṭhenawm tlangval tlema 99 deuh chu a rawn leng lut ve bawk a,"Max chuan ka rin loh lam daih a mi nupui a rawn hawn daih mai a,mak ka ti khawp mai,"a ti ve hlut a. Msi chuan,"Nia mahse,an inhmeh i ti ve lo mi? Keichu an inhmeh ka ti a sin,"a lo ti thung a. Chu tlangval chuan,"Keichu inhmeh pawh ka tilo e a,nangmah nen inhmeh ka ti daih zawk che u,"a ti leh a. Msi chuan nui chungin,"Aah i ho e mai a,thingpui ka lum sak ang che aw,"tih pahin choka lamah chuan a phei nghal daih a.

Kimkimi chu room aṭang chuan a rawn chhuk thla hnuk hnuk a,sitting room-ah chuan Notei leh a nu chu an lo ṭhu a,"Nu,khawnge Max kha?,"Kimkimi chu a hawi kual nghal ruai a. Notei chuan,"A duh duhnaah a kal ang ve ang chu,"a lo ti hluk a. Max-a nu chuan,"Aa i ho thei e mai,khatin an ti ngailo...Dawrah kuhva ka lei dawn a tia,a chhuak lawk a nihkha a rei lovang,"a lo ti dam thluam a. Kimkimi chu ngawi rengin a chhuak nghal vut a.

Msi leh a in leng tlangval chuan kuhva chu an kheh malh malh a. Msi chuan,"U Rem,nupui te hi nei ve tawh mai la. Mo lawm te pawh kan chak ve tawh a lawm,"tiin a fiamthu hlut a. Rema chuan,"Aaa nangniin min duh silova,nupui tur pawh kan hmu zo lo a nih hi,"tih pahin a nui hak hak a. Msi chuan,"Chutia mawn le,keini te chu tuman nupui atan min duh ve tak tak hleinem,"tih pah chuan a nui kur kur a.

"Khawnge Max?,"Kimkimi chu Msi te hmaah chuan a rawn ding to mai a. Msi chuan a hrethiam lo hle mai a,"Engnge a awmzia? Max chu a rawn kal miah lo?,"a lo ti nghal vat a. Kimkimi chuan,"Nang hi ka pasal ex i ni tiraw? Ka pasal chu khawnge i thuhruk a? Ka pasal a ni tawh tih i hrelo a mi?,"a ti nghal tuarh tuarh mai a. Rema chuan,"Ṭhiannu,i pasal chu a rawn kal miah lo mai a,khawngaihin haw zawk mai rawh,"a lo ve bawk a. Msi chuan,"Ni e a rawn kal lo tak tak,"a lo ti ve bawk a. Kimkimi chuan,"Dawt in sawi vaih aw,in chaklo viau ang,"a ti leh tûn tûn a. Pi Ruati pawh dawr aṭangin a rawn phei a,"Engnge ni ta buan buan a?,"a rawn ti a. Kimkimi chuan,"Ka pasal ka zawng,"a lo ti vin hlar a. Pi Ruati chuan,"I pasal hi a rawn kal ngai lo,hmun dangah a kal aniang,"a lo ti dam thlap a. Kimkimi chuan,"Nangnu kha hria ang che,ka pasal hi min laksak lovang,"a ti a,Msi chu a kawk sawk sawk mai a. Pi Ruati chuan,"A tawk e a tawk e,kan In chhungah hian eng buaina mah kan duhlo a nia. Khawngaihin min chhuahsan hram mai teh,"a lo ti nghal vat a,a âw pawh a vin ve lek lek a ni. Kimkimi chuan,"Hria ang che aw,ka pasal hi lo pawh pen tum suh ang che,"tiin a chhuak tau nghawng nghawng a. Rema chuan,"A va han rapthlak em em ve a,"a rawn ti chhuak phawng mai a.