ZU ZUAR FANU 45

CHAPTER--45

Ziaktu: R'z Thangluah

www.tleirawl.in

Msi leh Sangtea te inneih ni tur pawh an ruat fel dim diam ta. Msi chuan a duhthusam ang ngeiin ama thawh chhuah ngeiin  In lian tak leh ropui tak a sa ve thei ta. Chu Inah chuan a nu kawm hlim turin fahrah chawmna In aṭangain hmeichhe naupang an hruai lut ve bawk a. An va hlim teh reng êm! Msi chuan a unaunu chu a duat thiam khawp mai,a nau pawn a û chu kawng engkimah a zah em em a. Engpawh ti dawn se a û chu a rawn hmasa phawt ṭhin.

Nono-i chuan,"U,zanin chu home work min tihpui hman ang tiraw?,"tiin Msi bulah chuan a rawn ṭhu hnai a. Msi chuan nui sâng chungin,"Imm hman tehreng e,in school chu a nuam bawk em?,"a lo ti nghal vat a. Nono-i chuan,"Umm nuam lutuk ṭhian fel deuh deuh ka chhar thar bawk a,a nuam lutuk,"a lo ti ve nghal vat a. Msi chuan,"A lawmawm nasa nihchu. Chuan maw,thil 1 hrilh duh che ka nei a,"tiin a nau chu a kuah a. Nono-i chuan,"Imm min hrilh la,"a lo ti vat a. Msi chuan,"School ah chuan mi chi hrang hrang,mize in ang lo tak tak kan kal khawm ṭhin a. Mi fel tak tak leh misual tak tak te pawh an awm ang. Chuan maw,chu mi kha mi chu kawm suh a sual si tiin keichuan ka hrilh ve dawn lo che. Mahse,hei hi hre reng ang che aw,i ṭhiante chuan ruihhlo an ti a nihpawn tih ve kher loh tur a nia. Ruk an ru anihpawn ruk ve kher loh tur,i hrethiam tiraw? Ṭhian chu tupawh i kawm thei;mahse,an awm anga awm ve zel tum loh tur. Ṭhiante'n thil sual an lo ti anihpawn kawng dika hruai tu nih i tum zawk dawn nia aw,"tiin a nau chu a hrilh mawlh mawlh mai a. Nono-i chuan,"Awle Û,ka hre reng ang. I thu min hrilh te hi ka thinlung ah ka vawng reng ang,"a lo ti ve bawk a.

Jessy chuan a hmaia foundation bel thlawp thlawp pahin,"Awiii Msi te nufa han fel zia hi chu aw,"a rawn ti mawlh mawlh a. Siamtei chuan,"Nia ni ngawt mai,Pathian hi an ring bik ka ti dawn nge? Pathianin a hria ka ti zawk dawn? ....Awiiiii...Pawngi,i hmaia i hnawih kha engnge a?,"tih pah chuan a nui bu tlawrh tlawrh a. Jessy chuan hawi â ho pahin,"Lotion a ni lo mi? Awwii..ka duh thei lo a beh lutuk,i lotion hi a chhe chi niang,"tih pahin a ner nung nung a. Siamtei chuan,"A bawma in ziak te kha chhiar ve la,foundation a nihkha. I chhe beh tawp,"tih pahin a nui zui leh hawk hawk a. Jessy chuan,"Hmmm Pawngi le(h),min hrilh ve mai ta che,"tih pahin tissue paperin a hmai chu a hru nghal tawk tawk a. Siamtei chuan,"Awww foundation i hmang ve tawh emaw ka ti lawm,"a lo ti leh mai a. Jessy chuan,"Hmm foundation ka inhnawih ngailo tih pawh i hriat vek kha,eksek i van sual tak,"tih pahin a hmai chu a hru leh nghal tawk tawk a,"Awiii..a fai ṭha thei miah lo. Tuarpuii ka ang tawp,ka beh sia,"tih pah chuan a nui ve leh tlawrh tlawrh a. Siamtei chuan,"I chhe beh tawp Hrangi te pawh i an kha le,tak takin va phih fai rawh. Khatianga i hruk kha chuan a fai thei lo ang uluk deuhin va phih rawh,"a lo ti a. Jessy pawh chu a tho nalh a bath room lam pan pahin,"Ka hmuh turin foundation dah lang tawh miah suh ang che,"a rawn ti zui leh hram a. Siamtei lah chu a nui bu tlawrh tlawrh thung a.

Msi chu Casualty-a a duty ni a ni a,a buai map map khawp mai. A duty pui tur Doctor kha chhiat tawhna avangin a rawn kal thei ta si lova,vawiin chu a buai khawp mai.

Chawhnu lam dar 3.30pm velah chuan tlangval 3 hian hmeichhe 1 hliam tuar hi an rawn zawn lut a. Msi chuan a lo en vat a,Kimkimi a ni tih a hre nghal a,"Ṭhianpa,in ṭhiannu a mi a? Engtia na tuar nge a nih le aw?,"tiin a rawn zawn lut tu zinga mipa 1 chu a zawt nghal a. Chupa chuan hnuai lam melh zuk zuk pahin,"Aaaa englo a nia,bike in a su a,"a ti bah deuh niai a. A ṭhiante 2 lah chu an lo ṭi dui bawk si,Msi ngaih a ṭha ta lo,"FIR ka theh lut dawn nia aw,thudik sawi rawh u,"tih pahin chung mipa 3 te chu a melh tawn sek hlawm a. An zinga naupan hmel ber chuan zawi sup hian,"A zu ruiin buaina a siam a,"a lo ti a. Msi chuan,"Tichuan,kut in thlak tihna mi? Sawi ru,in sawi loh chuan Police ka ko dawn nia aw,"a ti leh khui khui mai a. Pakhat chuan,"Aww a dik a lawm,a pasal hlui bula kal a tum thu a sawi a. Ka phal lo a,kan inhnial buai a duh aiin ka kut a lo ram deuh hlek a,"tiin in thlahrun hmel takin hnuai lam melh chungin,zawi supin a rawn sawi a. Msi chuan,"Nang hi em ni a pasal thar chu?,"a ti leh a. Chupa chuan,"Aw ni e,"a lo ti mai a. Msi chuan,"A ṭha e,tunah rih chuan hlauhthawn awm lutuk a ni rih lova. Mahse,hmeichhe kut thlak ching mipa hi chu tupawh ni se tuai aipawn an nep. I nupui hi i Inah chuan i la hruai haw dawn em? Mahse,i hruai haw leh anihchuan kut i thlak tawh tur a ni lo,"a ti ve hmak hmak mai a. Chupa chuan,"Ka hruai tawh lo zawk mai a nge? Hei pawisa hi a in enkawlna sen so a tan,a duh chuan a pasal hlui chu pan leh rawh se,"tiin Msi kutah chuan ₹2000 note 2 a hmeh bel nghal chawt chawt a,"A lo harh leh hunah chuan a pasal hlui bula kal turin i lo ti dawn nia,kan kal a nge,"tiin an chhuak nghal daih a.

Msi chuan Kimkimi mu lai chu a en vang vang a,"Ngatinge i nun hi a hahthlak bik em em le?,"a ti sap a,nurse 1 chu a ko a,"He nu hi a lo harh hunah min hrilh nghal dawn nia aw,"tiin a chah a. Nurse chuan,"Awle mahse,khawnge i kal dawn a?,"a lo ti vat a. Msi chuan,"Ward fan tur kha Dr. Zuala lo kal silova,keimah ka han kal mai loh chuan,"a lo ti vat a. Nurse chuan,"Vawiin chu i buai ve ngawt mai tiraw? I hah tawh ngawt ang,damlo hi chu rawn ngaihtuah duh suh ka kutah dah vek rawh,"a lo ti ve mawlh mawlh a.

Msi leh Kimkimi lu tuam bura rawn in zui lut an hmuh chuan Max-a te chhungkua chuan mak an ti hle mai a. Max chuan,"Engnge thil awmzia?,"a lo ti vat a. Msi chuan,"Thu lawmawm lam zawk a ni,khawngaihin min ngaithla ru aw,"a lo ti nghal a. Max-a pa chuan,"Tehreng mai lo ṭhu phawt teh u,"a lo ti ve nghal bawk a.

Msi chuan,"Kimkimi hian ngaihdam dil che u a duh a,khawngaihin in ngaihthlak sak thei ang em?,"tiin Max-a chu a va melh zauh a. Max-a chuan,"Thei e,"a lo ti bul hmuk a. Kimkimi chu a thaw deuh hak a,"Ka nu,ka pa, ka tihpalh lutuk aw. In thusawi te kha lo awih ni ila,hrehawm takin hun ka hmang awm si lova. Mahse,mihring siamṭhat nan chuan khawdur a ngai an tih kha. Thu ṭha tam tak min hrilh lai khan,ka lo ngaithla duh ngai lova ka nun siamṭha tur in khawdur nghah kher a lo ngai a nih hi. Max,i rilru a la dam lo ang tih ka hria. Min ngaidam thei lo pawh ni la,ka dem lo che a sin. Nitin natna ka siam sak che a,keimah vangin i nun zawng zawng leh i zahawmna i hloh bawk a ka tihpalh tak zet aw. Note,nangpawh i rilru ka tina ṭhin anihkha tiraw? Unau in hmangaih tak ni ṭhin kha,in inkarah ka tla zep a hrehawm takin ka siam ṭhin che a tihpalh lutuk aw. Tunah hian min pawm leh tur pawn ka beisei lo che u a;mahse,in ngaihdamna ṭawngkam khat tal chu ka beisei ve a ni,"a ti a,a mit hnuai lam duk chur ah chuan a mittui chu a rawn luang ngiai ngiai a.

Kimkimi hian Max laka a uire aṭang khan ama chhungte ngei ngei pawh pan lovin,kha mipa rapthlak zet kha a um ta kha a ni a. Mahse,tunah chuan a thil tih dik loh zia leh a nundan ṭhat loh zia te hria in,insiam ṭhat tumin hma lam a pan dawn a ni. Max-a te chhungkua chuan an ngaidam duh dawn nge duh dawnlo tih pawh hre lovin,engkim huamin Max te chu ngaihdam a dil ta a;mahse,

Max chuan,"Kha leh chen kha hrehawm takin min siam a,i fanu ngei pawh i thlah thlam a. Tunah ngaihdam min rawn dil leh a maw? Keichuan ka ngaidam thei lo che,ka chhungte erawh hi chuan an ngaidam thei maithei che. Mahse,keichuan ka thei lo,"tih pahin a fanu chu a pawm a,In chung lamah a chhoh pui nghal nul nul a. Kimkimi chuan engmah a sawi tawh lo,ngawi rengin a tho a chhuah mai a tum a;mahse,"Bawihi,i pa ka nih angin keichuan ka ngaidam che a sin,"tiin Max-a pa chu a rawn tho nghal vat a. Kimkimi pawh chu a ding nghal chat mai a,"Ka pa,"tih pahin a rawn hawi a,a mittui chu a parawl kiang mai a. Max-a pa chuan,"Hmana i pa kha ka la ni reng a lawm,"tih pahin a lo kuah a,Kimkimi chu a insum thei tawh lo lungchhe takin a inhnit nghal hlawp hlawp mai a,"Ka pa,ka lawm lutuk aw,"a ti mawlh mawlh mai a. Max-nu pawh chu a rawn tho a,"Ka fanu,he Inah hian kan lo lawm lut leh a che,"tiin mittui parawl kiang chungin Kimkimi chu a rawn kuah a. Notei erawh ngawi rengin In chung lamah a chho ve daih a.

Kimkimi chu Max-a nu leh pa te chuan ngaidam mah se,amah Max-a ber chuan a la ngaidam thei si lo. Chumai nilovin Notei pawh chuan a la ngaidam thei lo a ni;mahse,Max-a pa chuan hmun danga kal a remti tlat si lo,"Hetah lo hmuh dangah i kal ka rem ti lo. Bawiha te unau chu i hriatthiam rih an ngai a ni mai,engtik niah emaw chuan an la ngaidam ve em em ang che. An rilru a la naupang a,i hriatthiam hram hram a ngai nia,"a ti a. Kimkimi chuan,"Ka pa,ka lawm lutuk a nia. Mahse,..,"a sawi zawh hma in a pa chuan a lo pawt chat a,"Mahse mahse,sawi a ngai lo. Nupa hlim tak in nih hi kan duh ber a ni ṭhin ka tih kha,tun aṭang chuan nupa hlim tak in nih theih nan nangman ṭan i lak a ngai takzet a ni. Ka fapa hi i hmangaih takzet a nihchuan,kan In hi chhuahsan tawh suh ang che,"a ti hmak hmak mai a. Kimkimi pawh chuan a pa thusawi chu a hnial duh ta lova.

Sangtea chuan Msi kuta vawn pahin,"Bawihi,nang ang hmeichhia hi an piang leh pawh ka ring tawhlo e a. An piang leh anihpawn kan fanu a ni ang,"a ti a,a nui sâng a a hmel chu hmuh a nuam takzet a ni. Msi chuan,"Fapa kan nei anihchuan a pa ang a hmelṭha,fel em em leh rilru ṭha a ni ve ngei ang,"tih pahin a lo nui sen sen a. Sangtea chuan,"A pa angin zu a rui ṭhin lo bawk a nga,"a rawn ti zauh a,Msi chuan,"Nia i sawi dik chiah,i hmui hian thudik chiah a sawi ṭhin. Ka hmangaih che,"tih pahin Sangtea chu a kuah vawng vawng a. Sangtea chuan,"Keipawn ka hmangaih che lawm,khang hun chhung zawng zawnga hrehawm ka tih ṭhin zia kha i hrethiam pha lo ang,"a lo ti ve thung a. Msi chuan,"Kei hian a sin hrehawm ti chu,ka ṭhiannu kha hlim turin ka duh bawk si. I bula hlim taka a nui hmel ka hmuh khan ka hlim rual rualin,kha ka hlimna phenah khan natna a in phum ru ṭhin a sin. Mahse,ka ṭhiannu hlimna kha keichuan ka laksak thei lo a ni,"a lo ti ve bawk a. Sangtea chuan,"I ṭhiannu khan nitin zan tin i hming lam lovin a awm ngai lo a sin. A tan i hlut zia te min hrilh ṭhin,"a lo ti ve bawk a. Msi chuan,"Ni e a ni kha ka tan pawh hian a hlu takzet a sin,a tello chuan ka kim lo riau hian ka hre ṭhin,"a lo ti leh a.


Msi te inneih ni chu mipui an ṭhahnem khawp mai. Biak In chhungah pawh leng lovin,Biak In kawtah an ṭhu ṭhap hlawm mai a. An inneih lawmpui tu te chuan thinlung takin an lawmpui vek a ni.

Hmana zu zuar fanu ti a an hmuhsit em em ṭhin leh kohhran Upa fapa zu ngawl vei tia an sêl luai luai ṭhin te ngei khan,Kohhran dan thianghlim ngatin Pathian hriatpuina thlapin 'TIAM TLAT E' an ti ve ta. Tunah chuan an numhluia thil hriat reng tlak loh te chu theih nghilh in hriat reng tlak te chauh hria in,hma lam an pan ta zawk a ni. Msi chuan ṭhian atan Emily a hmang a,Sangtea chuan ṭhian atan Hriata a hmang ve thung a. An inneih ni chu an hlim hlawm khawp mai,Max-a te chhungkua pawh an rawn kal kim khawp mai a;mahse,Kimkimi erawh a rawn lang ve ta lo a ni.

Kawna taxi stand-ah chuan taxi driver ho chu an ti ti sap sap hlawm a,Driver 1-na chuan,"Nimin a Sangte leh Msi te Innei kha a ropui khawp mai. Mi tam takin kan hmuhsit a kan en liam mai mai ṭhin,Zu zuar fanu a nia a nunah entawn tur a awm lo ang tia kan sawi ṭhin kha tunah chuan mi zawng zawng entawn a lo ni ta si a. Mihring te hian kan hma hun hi kan hre lo ve ngawt mai,"a ti ve siam siam a. Driver 2-na chuan,"Ni e a ni ngawt mai,kan veng aṭanga an hnawh chhuah te khan an chhungril nun hre lo chuan hnawhchhuah awm reng a ni tiin,ngaihdan kan lo siam ve a nihkha. Mahse,a lo ni lo chiang khawp mai,tunah chuan Msi nu hi nu ṭha tak a ni tih ka hrethiam ta. Khang hun lai khan zu te chu lo zuar ve bawk mah se,a fanu tan a thawk a ni a. Tun hnua ka ngaihtuah let leh hian keichuan ka dem em em hran lo,"a lo ti ve bawk a. Driver 3-na chuan,"Ni e a ni reng a sin,Nu Ruati zu zuar kha kan khawtlang hruaitu te khan an helh em em a. An fate zu rui buai erawh an man ngam leh si lo,hmeithai zu zuar an hre thei em em a. Mihausa leh neinung deuhte khehpuam kheh erawh an hre leh duh si lo,"a lo ti ve bawrh bawrh bawk a. Driver 4-na chuan,"Zu zuar kan huat ang hian mirethei te chan ai ei ru a,building lianpui pui sa ho te hi haw ve ngam i la. Zu zuar ringawt man lo hian,zu rui buaina siam ṭhinte hi man ngam i la ṭha tur a nia,"a lo ti ve bawk a.

Kimkimi chuan thingpui no 1 leh chhang kengin Max chu a rawn pan a,"Kha hei thingpui aw,"tih pahin Max-a ṭhutna sir dawhkan tê ah chuan a hung a. Max chuan,"He Inah hian engnge i la tih a? Ka hmu duh tawh lo che,uirenu ka hua che,"a lo ti vin ṭhak mai a. Kimkimi chu a phu deuh zawk nghe nghe a,"Ka tihpalh i mit hmuhah ka rawn in lan tawhlo ang. Mahse,ka hmangaih che a sin,"tiin a hmai a hup a,ṭap chungin pawn lamah chuan a tlan chhuak nghal a.

Kimkimi chuan engmah ngaihtuah lovin kawngpui chu a kân a,a vei lam aṭanga chak taka car rawn tlan chuan Kimkimi chu a rawn su leng dawrh mai a. Car pawh chu a ding nghal chawt a,"Nilo Lalpa,a ni thei lo a van pawi tak,"tih mawlh mawlh pahin lei char a Kimkimi let reng awmna lam chu a pan nghal hlawk hlawk a. Max-a nu leh pa te pawh chuan thawm hria in an rawn tlan chhuak ve nghal bawk. Kimkimi beng leh kâ aṭang chuan thisen a rawn luang chhuak nghal ngiai ngiai a,Car khalhtu pa chuan,"Damdawiinah kan kalpui vat a ngai nih hi,ka pi min lo zui ve ru aw,"tiin thi chhawnga let reng  Kimkimi chu a pawm a,Car hnung seat-ah chuan a mut tir nghal a. Max-a nu leh pa chu an ṭhu ve nghal a,"Bawiha pa,Notei kha phone la rawn kal nghal turin hrilh ang che aw. Bawiha chu keiman ka lo be mai ang,"tiin Max chu a call nghal a.

Casualty-ah chuan Msi duty ni a lo ni hlauh a,Msi chuan a lo buaipui nghal zung zung a,thisen a chhuah tam tawh avang chuan a chau khawp mai. A taksa te chu a vawt vek tawh a,oxygen an lo pe nghal a nurse 3 leh Msi chuan an buaipui nghal char char a.

Rei vak lo hnuah Max-a leh Notei te pawh an rawn thleng ve nghal a. Notei chuan,"Engtia chesual nge a nih reng reng a?,"a lo ti nghal a. Car khalhtu pa chuan,"A kawng kân tur kha kei ka hmanhmawh tawh bawk nen,ka motor ka lo control zo tawh silo ka su ta a lawm le. Pawi ka ti takzet a ni,a inenkawlna sen so zawng zawng chu keiman ka tum vek ang,"tiin in thiamlo tih hriat tak hian a meng dul raih a. Max-a pa chuan,"In thiamlo duh mah ta che,tu pawn tihpalh leh tihsual te chu kan nei thei vek a lawm. I duh vanga i tih a ni lo tih kan hre vek a nia,"tiin a lo hnêm ve thung a.

Nurse 1 chuan,"Ka pu,tunah a rang lamin thisen unit 2 kan mamawh a. Blood Bank-ah a blood group mil a lo awm lova,khawngaihin in ngaihtuah thei hram a ngem? A blood group chu O+ a nia,"tiin hmanhmawh zet hian a rawn sawi mawlh mawlh mai a. Car khalhtu pa chuan,"Kei hi O+ chu ka ni lawm,ka pe thei ang,"a lo ti vat a. Nurse chuan,"Awle helamah lo kal la,thisen pe turin i tling tawk em tih kan lo en fiah phawt ang che. Chuan,ka pu unit 1 dang chu khawngaihin lo ngaihtuah hram ru aw,"tiin Car khalhtu pa nen chuan an inzui chhuak ta a.

Max-a pa chuan,"Bawiha,i ṭhiante pun tur i hre lo mi? Bawihi,nangpawh kan mangang a nih hi,"a rawn ti chuai raih a. Notei chuan,"Whatsapp group velah kan post a nge,"tiin a phone chu a kheuh nuap nuap a. Max erawh chu a ṭhutna ngaiah ṭhu in,a la ngawi reng thung a,"Bawiha,i ṭha meuh maw?,"tiin a pa chuan Max-a darah chuan a va sawi det a. Max chuan,"Ka pa,Kimkimi hetianga a awm chhan hi keimah vang a ni. Chhuak turin ka ti a,a chhuak a;mahse,hetiang hi a thleng leh si,"a lo ti chuai raih a. A pa chuan,"Khaih khaih khatin mipa an awm ngai lo a nia. Pachang takin awm zawk ta che,engmah a thleng dawnlo a nia a ṭha leh vek mai ang,"tiin a fapa darah chuan a beng thak thak a.

Nurse 1 chuan,"Ka pu,thisen unit 1 chu kan nei tawh e. Mahse,unit 1 dang a la ngai nia aw,"tiin a rawn hrilh leh a. Max-a pa chuan,"Awle kan zawng mek e,kan zingah hian a blood group mil tumah kan awm lo hi a buaithlak a ni,"tiin a chal a dawm a,a thaw leh hak ṭhin a.

Rei fe hnuah chuan Sangtea pawh a rawn lang ve hlawl mai,"Engnge in an tawh le?,"a rawn ti nghal vat a. Max-a nu chuan,"Ee nang e law? Hei engmah kan la ang thei rih lo a ni,"a lo ti nghal vat a. Nurse 1 chuan,"Ee i rawn thleng tawh maw? Min lo zui nghal mai la aw,"a ti a,Sangtea pawh chuan ngawi rengin nurse chu a zui nghal a.

Nurse 1 chuan,"Damlo chu a harh tawh e,in hmu thei tawh ang,"tiin au lauh lauh a. Max te chu an tho rual ṭhap mai a,Kimkimi mutna lamah chuan an phei nghal a. Kimkimi lu chu an lo tuam bur mai a,a hmai vel chu a kak nual bawk a,a mit leh leh lam chu a vung phui vek bawk a. Chuti chung chuan a chhungte chu hmel hlim tak pu in a rawn nuih sâng a. Max-a pa chuan,"Bawihi,i lo harh tawh maw? A van lawmawm tak êm,i nu te pawh an rawn kal mek aw,"a ti nghal mawlh mawlh a. Max chuan,"Bawihtei nu,ka tihpalh lutuk aw,"a lo ti ve bawk a. Kimkimi chuan nui sâng chungin,"Engmah a ni hleinem,ka ṭha leh vat mai dawn a lawm,"tih pahin a fanu biangah chuan a rawn chûl a. A fanu kum 1 leh a chanve leka upa la ṭawng fiah vak lo chuan,"Apa,ama hi na na mi?,"tiin a pa chu a zawt a. Kimkimi chuan a fanu in Amâ tia a koh a hriat chuan lawm avangin a biangah mittui a lo luang a,"Bawihte,amâ hi a dam leh vat dawn a lawm,"tiin a fanu kut chu a vuan a. A fanu te reuh chuan fiah ang reng hian,"Amâ,dam vat rawh aw,"a rawn ti leh a,Kimkimi chuan insûm har a ti hle mai,kum 1 chhung tehmeuh a fanu a tlanbo san hnu pawn,a fanu rilru thianghlim tak chuan amah hringtu nu chu a la theihnghilh bik lo ni,"Bawihte,Amâ hi a dam leh vat dawn lawm,"a ti a,a mittui chu a rawn luang nghal zawih zawih a. Msi chuan,"Khawngaihin a hahdam zawk nan min lo chhuahsan rih phawt mai dawn mawn le,tunah chuan a la chau rih e mai,"a lo ti a. Max te pawh chu an chhuak sap sap hlawm a.

Thla 3 zen zawn damdawiinah a awm hnu chuan Kimkimi pawh dam takin a lo chhuak ve ta. Max pawh chuan lungawi tak engkim theihnghilh in a lo pawm ve nghal bawk a,tunah chuan nupa hlim tak an ni chho ve ta.

Msi pawh an inneih aṭanga thla 6 hnu velah chuan a uak a uak ve ta. Zanah chuan a pasal in bual zo chu a lo nuih sâng a,"Putarte,thil surprise tur che ka nei a sin,"a lo ti a. Sangtea chuan,"Eng thil nge ni ta a? Ka van hre chak tawh ve a?,"tih pahin a beng a rawn chhi nghal hru a. Msi chuan Sangtea kut chu a la a,"Tun aṭang nu leh pa tak tak kan ni ve dawn ta. Ka pum chhungah hian naute a awm tawh a sin,"tiin Sangtea kut chuan a pum chu a dawm tir a. Sangtea chuan,"Woow...pa tak tak ka ni ve dawn ta. Ka van hlim tak,ka hmangaih che Bawihi,"tih mawlh mawlh pahin Msi chu a kuah vawng vawng mai a. Msi chuan,"Fapa nge fanu i duh le? Keichuan fanu ka duh a,"tih pahin a nui var var a. Sangtea chuan,"Ka duh dan chuan fapa ka duh a;mahse,nu berin fanu i duh tlat chuan fanu kan duh ve mai aniang chu,"tih pahin Msi hnarah chuan a pawh sak zauh a. Msi chuan,"Vel a che aw,"tih pahin Sangtea sam chu a tuai thur sak leh a,an 2 chuan an nui dun hawk hawk a.


Msi pawh a rai lian ve tawh khawp mai,fa 1 na tur a ni bawk a. A pasal leh a pasal chhungte chuan an duat thiam khawp mai,a naute pai chu thla 8 vel a ni ve tawh a. Damdawiinah pawh kal tawh lovin chawlh a la ve ta rih a,In lamah a theih ang angin a che ta zawk a.

Inrinni chhun a ni a,Msi chuan a pum chu na a ti khawp mai. Choka aṭang chuan sitting room lamah chuan a rawn phei a,"Bawiha,ka pum a na lutuk naute ka nei tawh dawn niang,"tiin a rawn in dawm kun tlawk tlawk mai a. Sangtea chuan a rawn kai vat a,"Tah hian lo ṭhu rawh motor ka lo zu la chhuak a nge,...Pa,...U..lo kal vat teh u. Naute kan nei dawn nia,"tiin a û leh a pa chu a au nghal lung lung bawk a. Partei leh a pa pawh chu an rawn kal nghal a,"Pa,tikhan lo awmpui rawh aw. Naute thuamhnaw vel ka lo han buaipui a nge,"tiin In chung lamah chuan a tlan chho nghal a.

Msi chuan nau chu a vei ve ṭan ta a,na a ti ve ngang mai. A bulah chuan a nu leh Sangtea an awm reng a. Midang erawh pawn lamah an awm thung a.

Chawhnu lam dar 3.00pm velah chuan dam takin a naute chu a hring chhuak ve ta. Nurse chuan,"Awii a lian reuh lutuk,fanu i nei a nia,"a lo ti nghal mawlh mawlh a. Msi chuan,"Lalpa,ka lawm e,"tiin ama hriat tawk lek chuan a phun sep a.

Nurse 1 chuan nau neihna room aṭangin naute chu a rawn pawm chhuak a,a hnungah wheel chair-in Msi chu an rawn nawr chhuak bawk a. Nurse chuan,"Kan lawmpui che fanu i nei e,"tih pahin Sangtea chu a lo nuih sâng a,Sangtea chuan,"Ekhai a va lawmawm ve aw,"a lo ti ve nghal vat a.

Msi chu khumah chuan an mut tir a,a bulah chuan naute chu an mut tir nghal bawk a. Nurse ho chuan an lo en sap sap hlawm a,"A hmelṭha hle mai,a lian reuh si,"a rawn ti ve siam siam hlawm a.

Max te nupa pawh nupa hlim tak niin an nun an hmang chho a. Engkimah an fanu chu an dah hmasa ber ṭhin,Kimkimi pawn a nun a thlak a a fanu tan nu ṭha tak nih a,a pasal tan nupui ṭha tak nih a. A pasal chhungte tan mo ṭha tak nih chu a tum nghet tlat a,a tum ang in a awm reng bawk a. Tunah chuan chhungkaw hlim thei tak an lo ni leh tawh a ni.

Emily leh Hriata erawh chu inneih lam la sawi lovin ṭha takin an la in zui a. Thianghlim takin an in ngaizawng chho a,chhungte hriatpuina thlapin engkim an ti ṭhin a. Mi tam tak awh rawn leh entawn an ve ta.

Msi te nupa pawh an hlim khawp mai. An fanu chu an âtchilh a ni deuh ber mai e,a pu lah chuan a lawm em em mai bawk si. An chhungkua chuan keh thei dawmin an dawm a ni ber mai,Msi nu te pawh naute awm turin an hun awl neih apiangah chuan an rawn kal ziah ṭhin a,an hlim ho dar dar ṭhin khawp mai.





______A TAWP TA________


Mihring te hi kan dinhmun ngaiah kan ding reng ngai lo. Tuna kan hmuhsit em em leh kan nuihzat em em pawh hi nakinah chuan an puihna dilin an hmaah khawngaih kan la dil thei. Misual ber ni a kan hriat te pawn an nun thlakin mifel tak an rawn ni ve thei.

Mi hnuaihnung ber ni a kan ngaihte pawn ding chhuak tura tumna an neih tlat chuan an ding chhuak nge nge ṭhin.


Ka story ziahte min lo hlut sak a,min lo chhiar chhuah sak a thurawn ṭha tak tak min pe ṭhintu te zawng zawng chungah khan ka thinlung takin lawmthu ka sawi mawlh mawlh e. Ka dam a nga,Pathianin rem a tih chuan story thar nen kan in hmu leh vat dawn nia. Ka lawm e.


Ka thuziak ṭhenkhat ka lo share ve leh lawk a nge aw.


*_🌼"Hmeithai leh pachhia te tan khawvel hi a nunrawng,"i ti em ni?🌼_*

_Tinge i beidawn tak mai a?_

_Hmeichhe chak tak i nih ṭhin kha,_

_Hmeichhe ropuina pakhat chu maw,an tawrhchhelna hi a ni a sin._

_Nang pawh khawvela hmeichhe ropui ber ber te zingah i hming hi a chuang ve a sin,_

_Tinge beidawng takin i indawm kun tak mai le?_

_Beiseina êng i la neih kha,i chhem mit mai dawn em ni?_

_Nilo chak takin i ding leh tur a ni. Hmeichhe chak tak leh ropui tak i nih kha._



*R'z Thangluah✍🏻*

```22th June,Zirtawp Ni 2018
1:32 P.M```



⚖  ⚖  ⚖ ⚖  ⚖

*✍🏻Mahni fate sualna hmu silo hian,midang fate sualna kan hmu lian viau lawi si.*


*✍🏻Mahni chhungkua pawh rel fel theilo hian,ṭhenawm te chhungkaw buaina rel fel ṭalh kan tum ṭhin a.*


*✍🏻Mahni sualna zawng zawng dahṭha in,midang sualna erawh kan phawrh chhuah sak leh ṭhin si.*


*✍🏻Midang fakna âwka chhuah aiin,sawisêlna âwka chhuah tir nuam kan ti zawk a.*

*✍🏻Mahni aia hniam zawk leh neilo zawkte puih aiin,an neihsa lak sak pawh kan hreh ta lo.*






*R'z Thangluah THUNAWI leh mai mai.*

```8th June,Zirtawp Ni 2018
12:14 P.M.```





*KA LAWM E*

🌼🎀✍🏻